استعراضات, مقالات

ليه تتحمس FIFA 21

فاضل تقريباً خلاص حوالي أسبوع أو أقل قبل حصولنا علي الجزء الجديد للعبة فيفا FIFA 21 ، ومن وقت ما طلع أول تريلر ليها قلت أكيد EA مش واخدة بجدية تطوير اللعبة ، لكن إتضح إني كنت غلطان لإن بعدها بفترة قليلة .. بدأنا نشوف عروض جديدة للعبة وتريلر ينزل ورا التاني ، وتقريباً أول مرة أشوف قسم التسويق في EA متفوق علي نفسه بخصوص إصدار لعبة فيفا الجديدة .. فيفا 21 حصلت تقريباً علي 3 أو 4 عروض للعبة نفسها ، كل عرض كان بيشرح إيه الإضافات الجديدة علي أطوار زي الكارير والألتميت تيم وفولتا .. أنا متابع أخبار اللعبة بقالي تقريبا شهرين لحد دلوقتي وبمناسبة إن خلاص مش متبقي إلا أيام قليلة علي صدور اللعبة بشكل رسمي ، قررنا نعمل ليكم إستعراض جديد عن فيفا 21 من سلسلة مقالاتنا في جيمزاوي (ليه تتحمس 🤔)

فيفا 20 بالنسبة لي كانت كارثية خصوصاً في طور الكارير اللي بقضي فيه أغلب وقتي في اللعب ، وللأسف جربتها أسبوع وحذفتها وفضلت علي فيفا 19 لحد وقتنا هذا (وعلي الأقل كمان عشان الواحد يحس بالنقلة والتغيير بما إنه فوت إصدار سنوي😄).

لو هنتكلم عن تغييرات فيفا 21 والحاجات اللي تخليك متحمس ليها فأنا هبدأ بطور الكارير Career Mode لإن زي ما قولتلكم فيفا 20 كانت بتحتوي علي أسوء كارير مود أنا شوفته ، لدرجة كان كل شوية يطلع هاشتاج علي تويتر اسمه Fix Career Mode ، بالإضافة إلي إن التغييرات اللي كانت فيه كانت شكلية مش أكتر.. فيفا 21 تغييرات الكارير فيها هتخلي اللعب أعمق ومليان تحدي وده هيخلي اللاعب يستثمر في المود ده وقت أطول من السابق .

شركة EA Sports أشوفها بذلت مجهودات كبيرة في تحسين تجربة المود من ناحية تطوير اللاعبين ، فاللعبة أول حاجة هتخليك تركز علي 3 أشياء أساسية عشان تطور فريقك وهي الـ Moral اللي كانت موجودة في الأجزاء اللي فاتت وهي عبارة عن معنويات اللاعب واللي بتتأثر بمدة اللعب ومكسب وخسارة الفريق .. الحاجة التانية وهي الـFitness واللي بتتأثر بالمباريات والتدريبات اللي بيعملها اللاعب ، والحاجة الأخيرة والجديدة وهي الـ Sharpness ومعمولة في اللعبة علي شكل جوهرة واللي بتأثر بشكل أساسي علي تطويرات اللاعب والـ Potential تبعه واللي بيأثر بعد كده علي الـ OVR بتاعه خاصة لو لاعب شاب.

وبجانب الـ Sharpness ففي حاجات تانية في الجزء ده هتأثر علي الـ OVR لكل لاعبين فريقك من ضمنهم الـ Moral اللي اتكلمنا عنها فوق والـ Position الخاص باللاعب ، فأخيراً EA هستسمح لينا أخيراً بالجزء ده إننا نغير مركز اللاعب يعني لو عندك مهاجم ممكن تخليه جناح وهكذا ، طبعاً إنت كان ممكن تعمل الكلام ده في الاجزاء اللي فاتت وانت بتغير خطة الفريق لكن اللي كان بيحصل إن اللاعب غير مكانه فقط ليس إلا ، لكن في فيفا 21 الـ OVR الخاص باللاعب هيتغير لو غيرت مركزه الأساسي ده غير الـ Attributes بتاعته هتقل كمان لإن اللاعب في الجزء ده بيتطور في كل مباراة بيلعبها عن طريق الـXP وكمية الـ XP بتتوزع علي شكل نقط للـ Attributes الخاصة باللاعب زي الـ Dribbling والـ Passing والـ Shooting والـ Pace وانت اللي بتحدد للاعب الـ XP اللي بيكسبه يروح لمين علي حساب مين عن طريق إنك تغير طريقة الـ “Growth” الخاصة بيه ودي بتختلف من مركز للتاني يعني المهاجمين ليهم طرق Growth خاصة بيهم مختلفة عن المدافعين زي ما هو واضح في الصور تحت.

تغيير كبير تاني في المود وهو التدريبات اللي هتنظمها للاعبين كل أسبوع علي شكل جدول واللي اتغيرت بشكل جذري عن الجزء اللي فات ، فبدل ما كانوا 5 لاعبين بس بتدربهم عن طريق إنك تعمل Skip للتدريب ، دلوقتي زاد العدد لـ 15 وكمان ممكن تدربهم عن طريق إنك تلعب بيهم في التدريبات نفسها ويبقي إنت في إيدك القرار إن اللاعب ياخد A ولا D في التدريب، وكمان عشان لازم تزود الـ Sharpness الخاصة باللاعب لازم تحطه في برنامج تدريبي ولكن في المقابل هيقل الـ Fitness تبعه ، فلازم توازن في التدريب خصوصاً أنه لو زاد الـ Sharpness اللي هيكسبه اللاعب الـ Fitness بتاعه هيقل بشكل أكبر .. وفايدة الـ sharpness زي ماقولنا إنها بتزود من قدرات اللاعب عشان يزيد الـ OVR تبعه ولكن هتشتغل إزاي في اللعبة؟

شركة EA Sports وضحت بإن لو الـ Sharpness الخاصة باللاعب تبعك لو أزيد من 50 لحد 100 ، هيجيله boost علي نقط الـAttributes بتاعته ولو أقل من 50 طبعاً هتقل الـAttributes ومعها هيقل الـ OVR للاعب.

في تغييرات تانية علي مود الكارير بس هنتكلم عنها بسرعة ومش هنحتاج نتعمق فيها زي التغييرات اللي فاتت ، البداية مع تغيير نظام محاكاة المباريات بالكامل .. فبدل من الأول إنك كنت تشوف النتيجة علطول لما تيجي تحاكي أو تعمل sim لأي مباراة ، دلوقتي في الجزء الجديد هيبقي قدامك زي في الصور تحت كده شاشة جديدة هتتابع من خلالها المباراة وهي شغالة بوقتها الطبيعي وهتقدر تعمل تغيرات وتدخل كمان المباراة نفسها في أي وقت وتكمل لعب بنفسك.

ميزة تانية ضافتها EA وهي إنك قبل ما تبدء الكارير بقي في خيار جديد وهي Financial Takeover ودي بتخليك تحدد الميزانية اللي عايز تبدأ بيها الموسم وهتساعدك كتير خصوصاً لو بادئ بفريق ضعيف.

مركز الشباب أو Youth Academy في الجزء ده بقي موجود بشكل أساسي مع شوية لاعيبة شباب موجودة فيه بشكل تلقائي ، ومش هتحتاج زي في الأجزاء اللي فاتت إنك تشتري الأول Scout وبعدين تبدأ تخليه لسه يدور علي لاعيبة شباب مع إن الخيار ده لسه موجود لو عايز تزود عدد الكشافين عندك أو الـ Scouts.

نظام الانتقالات مش هنقدر نقول إتحسن قد ما EA رجعت حاجات قديمة كانت موجودة في الأجزاء اللي فاتت ، زي إنك تتعاقد مع اللاعب بنظام الإعارة مع خيار الشراء أو إن المدرب اللي بتتفاوض معاه يعرض عليك لاعب مقابل لاعب ولكن الجديد هنا إن EA ضافوا نظام الـ Strict negotiation لو إنت زي حالاتي وعايز تصعب الأمور علي نفسك شوية في سوق الإنتقالات ، فالنظام ده بيزود التحدي وبيرفع شوية حاجات في الذكاء الإصطناعي زي إنك مش هتعرف تتعاقد أو خلينا نقول “هتتقاعد بصعوبة” مع لاعب في فريق منافس ليك بشكل مباشر ، اللاعيبة اللي من أكاديمية النادي وبقت تلعب مع الفريق الأول بتاعها هيبقي صعب تتعاقد معاهم ، مش هتعرف تتعاقد مع لاعب معداش عليه أقل من سنة مع فريقه الجديد ، لو فريقك أقل مستوي وشهرة من فرق تانية مش هتعرف تستقطب لاعيبة من الفرق دي وهيرفضوا طلب إنضمامهم ليك.. طبعاً كل الكلام ده ممكن تلغيه وتخليه loose وده هيشيل كل القيود دي.

حاجة أخيرة هتلاخظها في مود الكارير وهو إعتزال اللاعبين الكبار في السن ، فدلوقتي اللاعب هيعتزل مع وصوله لسن الـ 40 مش قبل كده أو في سن صغير زي ما كنا بنشوف في الأجزاء اللي فاتت.

الطور التاني اللي هنتكلم عليه هو الألتميت تيم Ultimate Team واللي نال تغييرات ملحوظة وهتعجب كمان ناس كتير زيي تقريباً اللي زهقوا منه من فيفا 18!

البداية مع إضافة اللعب التعاوني أو الـCo op في مباريات Diviosn Rivals و Squad Battles ، فبقي ممكن تعمل دعوة لواحد من صحابك ويدخل يلعب معاك الجيم وتخلصوا التحديات مع بعض ، بس خلي بالك إنك لو عملت إنفيت لحد ديفيجين أعلي من ديفيجن بتاعك ، هتلعب المباراة بمستوي الديفيجين بتاعه بس هتتقدم عادي في الديفيجين بتاعك زي ما انت، بالإضافة إلي إنهم زودوا أخيراً مساحة الـLeaderboards وهيبقي فيها التوب 200 بدل من التوب 100.

إضافتين جداد تانيين علي طور الألتميت تيم ، الأولي هي تخصيص الملعب الخاص بفريقك ، فبدل من إنك تشتريه من الستور أو تفتحه في باكات زي الأول ، دلوقتي هتبدأ مع ملعب صغير وهتبدأ تكبر الملعب وتزيد مساحته لما تبدأ تعلي ليفلك في الألتيمت تيم .. الباكات نفسها هيبقي فيها الـ Customization الخاصة بالملعب نفسها زي الكؤوس والديكورات والشعارات الخ…

الإضافة الأخيرة والأفضل بالنسبة لي هي حذف كل الـ Training Items والـ Fitness و أخيراً دلوقتي هتبدأ كل مباراة واللاعبين بتوعك لياقتهم كاملة.

طور كرة قدم الشوارع Volta هيرجع من جديد بفيفا 21 ، ورغم إني مكنتش راضي عنه خالص في الجزء اللي فاتت بسبب إحساسي إنه كان ناقص جداً في المحتوي، ولكن أفضل حاجة إن الجزء ده هيكمل عليه بإضافات جديدة زي Volta Squads وفيها بتعمل تيم مع صحابك وتلعبوا مع بعض و Featured battles وهي شبه Squad Battles في الإلتميت تيم واللي بتتحدي فيها فرق لناس تانية ، إضافة طور قصة جديد إسمه The Debut مدته حوالي 3 أ و4 ساعات بيقدم معاه اللاعب البرازيلي المشهور كاكا ومن خلاله بتعرف أكتر عن إزاي تلعب مود الفولتا وإستراتيجات اللعب والمهارات الخ..

مود الـ Pro Clubs نال برده حظه من التغييرات ولكنها هي الأقل من بين كل الأطوار وحصل علي ميزتين جداد وهما إنك بقي ممكن تعدل علي أي لاعب عندك في الفريق وتخصيصه بأكتر من طريقه سواء شكله أو طريقة إحتفاله وغيرهم ، الميزة التانية وهي إضافة الخطط السريعة لتشكيلة فريقك زي اللي موجودة في المباريات العادية وهما Attacking و Defence و Balanced و Ultra.

أخر حاجة لو هنتكلم علي الجيم بلاي نفسه مكنش فيه غير كم تغيير أو “تحسين” بمعني أصح يستحقوا الذكر زي تحركات اللاعبين اللي حوليك حسنها المطور بشكل بقت أقرب للواقع أو للأركيد 😅علي حسب بصراحة الطريقة اللي هيفتح بيها اللاعب اللي معاك في الفريق ، ولكن بكل الأحوال فإنطلاقات اللاعبين عشان يفتحوا الهجمة ليك تم تحسينها وإتخصصلها كمان زرار وهو الـ L1 أو LB والأنالوج اليمين.

تمركز اللاعبين إتحسن برده بشكل ملحوظ وبقي فيه وعي أكتر عند الذكاء الإصطناعي للاعبين إمتي يتقدموا لبناء الهجمة ويفتحوا مساحات أو إمتي يرجعوا لتغطية الكرة ويعارضوها هكذا.

إضافة مود صعوبة جديد للي بيلعب اللعبة علي الـ Legendary أو الـ Ultimate وهو الـ Comptetor mode وده بيخلي الـCPU أقرب لإنه منافس حقيقي ومش أي منافس كمان ، هتلاقي مستواه قوي جداً ومشابه لمستويات الناس اللي بتلعب في تصفيات FUT Champions كل سنة ، ميزة مهمة برده ضافتها EA وهي الضربات الرأسية بقي ممكن تخليها دلوقتي Manual أو يدوية من الإعدادت ودي حاجة كويسة للي كان بيشتكي من قلة التهديف بالضربات الرأسية لأنك في فيفا 21 هتبقي إنت اللي بتتحكم في الكرة في كل مرة بتحاول ترفعها من خلال العرضية .

إضافة تانية إتكلمت عليها EA في الجيم بلاي وهي طريقة جديدة للإحتفاظ بالكرة عشان ترواغ المدافعين خصوصاً لو معاك لاعيب مهاري وبصراحة مش عارف هل هتبقي ميزة overpowered ولا عيب إلا لما نشوفها ونحكم عليها لما تنزل اللعبة

طريقة تخليص الكرة رغم إنها مش حاجة كبيرة ، ولكن EA حطتها في الإعتبار وركزت علي تحسينها وتحسين الذكاء الإصطناعي للاعبين لو إلتحموا مع بعض علي الكرة ، ولو حصل معاك موقف إلتحام في فيفا 21 لأكتر من لاعب ، هتلاقي واحد منهم بيبعد الكرة بشكل تلقائي.

في النهاية حابب أقول إن حاجة كبيرة لما أعمل مقال ليه تتحمس للعبة سنوية 🙄 وده يوضح قد ايه حجم الإضافات اللي إشتغلت عليها EA بفيفا 21 ،خصوصاً إني كنت مقاطع الإصدار اللي فات فيفا 20 ،ولكن يبدو بإن فيفا 21 هتكون ممتعة ومختلفة بشكل أو بأخر عن الجزء اللي فات ومن خلالها بتعوض EA عن خيبات الأمل اللي حصلت لكتير من الناس في فيفا 20 وأنا منهم بسبب عدم جهوزية اللعبة وقتها والإستعجال في نزولها ،ده غير أن مكنش فيها أي إضافات جديدة غير طور الفولتا.

Hussein Osman

About Hussein Osman

محرر وكاتب علي باب الله ، بقدّر جداً هواية الفيديو جيمز ،ومن وأنا صغير هوايات كتير اتغيرت في حياتي إلا ألعاب الفيديو متغيرش حبي ليها بالعكس كان بيزيد مع مرور السنين .. بعشق جداً ألعاب الاربيجي سواء الغربية زي فال اوت وويتشر وايلدر سكرولز او اليابانية زي فاينال فانتسي وبيرسونا ودراجون كويست