الأخبار, دليلك

ليه بث State of Play الأخير كان فاشل ؟

blank

من يومين بالظبط شوفنا بث State of Play من Sony PlayStation وللأسف كالمتوقع البث كان عبارة عن ساعة الا ربع مخيبين للآمال !

سوني قبل البث كانت بالفعل أكدت إنه هيركز بشكل أساسي على ألعاب PlayStation 4 و PlayStation VR وهيتم إستعراض جيم بلاي من ألعاب لـ PlayStation 5 شوفناها قبل كدة في بث PlayStation 5 The Future of Gaming.

blank

لحد هنا الكلام كان تمام، البث بدأ بإستعراض جيم بلاي رائع للعبة Crash Bandicoot 4 It’s About Time والي هتتوفر في 2 أكتوبر 2020 على Xbox One و PlayStation 4، ولكن للأسف بالتدريج البث بيبقى سيء أكتر من الأول.

حرفياً حوالي 90% من الألعاب الي كانت موجودة في البث المباشر هي تجارب من مطورين مستقليين محدش مهتم إنه يجربها وكلها تجارب كرتون، حتى مفيش ألعاب Indie كتير كانت بتشد انتباهك طول البث المباشر وكان فعلياً عبارة عن تضييع وقت.

blank

مفيش غير كام لعبة بس هما الي كانوا كويسين في البث وهما طبعاً Crash Bandicoot 4 It’s About Time و The Pathless وهي لعبة من مُطور Abzu هتتوفر على الحاسب الشخصي و PlayStation 5 و PlayStation 4 في أواخر 2020.

اللعبة الأخيرة  الي تم إستعراضها كانت Godfall وديه واحدة من حصريات الإطلاق لمنصة PlayStation 5، الجيم بلاي كان مميز جداً ومُحبي ألعاب Dark Souls والحاجات الشبيهة هيستمتعوا جداً بأسلوب اللعب الخاص باللعبة لإنه مميز وعنيف.

blank

بس كدة، هما دول الـ 3 ألعاب المهمين الي كانوا في البث والي يشدوا الإنتباه، طب هنا السؤال كالآتي : طالما سوني كدة كدة بتجهز لبث مباشر تاني هيركز على PlayStation 5 اخر الشهر، ليه الشركة مدمجتش البثين في بث واحد يبقى مدته ساعة ونص أو 2 ويكون بث طويل يستعرض كل حاجة على PlayStation 4 و PlayStation VR  و PlayStation 5 وتبقى حاجة ضخمة تبين ان الشركة لسة مهتمة بالجيل الحالي وفي نفس الوقت بتحمسنا لحاجات قوية للجيل الجديد.

فكرة انك عملت بث مدتة 45 دقيقة بيركز على ألعاب PlayStation 4 ( ويارتهم ألعاب عدلة أصلاً ) كان تفكير خاطئ جداً من سوني والكل انتقدت الكلام ده على مواقع التواصل الإجتماعي. بشكل عام إستعراض الألعاب ديه في بث مستقل زي ما حصل كانت خطوة ملهاش لازمة وكان الأفضل ان كل ده يتضم في بث واحد مع إستعراض لمنصة PlayStation 5 وسعرها وموعد الإصدار.

blank

غير كدة فا لما الشركة قالت إنها هتستعرض جيم بلاي من ألعاب لمنصة PlayStation 5 تم الإعلان عنها سابقاً، الكل توقع إننا نشوف جيم بلاي لحاجات قوية زي Resident Evil 8 Village أو Demon’s Souls أو Spider Man Miles Morales ولكن كل الي طلعنا بيه في الاخر هم مجموعة من الألعاب المستقلة ولعبة اسمها Bugsnax مش عارف مين هيكون متحمس انه يلعبها أصلاً !

على العموم من رأينا في Gamezawy إن البث ما هو الا عبارة عن تضييع وقت وتخييب كبير للآمال ولازم سوني تركز على انها تعمل بث مباشر على حاجات تستحق بعد  كدة عشان اللاعبين ميتحمسوش على الفاضي.

موعدنا مع البث القادم في النصف الثاني من أغسطس وعلى حسب التسريبات فالبث الي جاي هيبقى يوم 20 أغسطس الساعة 10 مساءًا بتوقيت مصر، الكلام ده لسة متأكدش بشكل رسمي ولكن مجموعة من المُسربين شاركوا بيه. البث ده هيركز على منصة PlayStation 5 وحصرياتها والسعر وموعد الإصدار والطلبات المُسبقة وكل حاجة هتبقى حابب تعرفها عن جهاز سوني للجيل الجديد.

Ahmed Yousry

About promidoz

Editor-in-Chief. About 5 years of experience in Gaming Journalism with more than 13k news written, tens of articles, video scripts and reviews. A hardcore gamer that loves a challenge.