Articles, Events, Gaming News, News

كل التفاصيل الجديدة عن لعبة Elden Ring

وبعد طول إنتظار استمر لمدة سنتين، إستوديو From Software رجع بإستعراض أقل ما يقال عليه انه خرافي للعبة Elden Ring وعرفنا تفاصيل جديد كتيرة عن اللعبة حبينا نتكلم عليها معاكم النهاردة.

ده هيكون أضخم عالم إستوديو From Software صممه لحد دلوقتي، واضح من الإعلان اننا هنشوف مجموعة ضخمة من الممالك الي هنقدر نستكشفها بالإضافة إلى مناطق و Biomes مختلفة في الخريطة ليها طابع وأسلوب لعب خاص ومميز.

العالم هيكون مفتوح بالكامل بمعنى إنك هتتقدر تتجول بشكل ضخم في مختلف المناطق بسلاسة وسهولة، العالم هيكون كمان متناسق ومتداخل زي أسلوب سلسلة Dark Souls فا متنساش تدور على الـ Shortcuts الي هتسهلك الحركة والتنقل.

لعبة Elden Ring هي أول تجربة من From Software هتقدملنا فكرة التنقل عن طريق حاجة تركبها، واضح من الإعلان إن الحاجة ديه هي خليط بين حصان وغزال احمر وشكلها هتكون حاجة مميزة وأساسية في عالم اللعبة. عشان تستدعيه بتصفرله وبيظهرلك من العدم كدة زي ما واضح في الإعلان برضو.

الأعداء واضح انهم هيكونوا اصعب واضخم من اي لعبة عملها الإستوديو قبل كدة وفي مجموعة كبيرة من الزعماء الي هنستمتع بمواجهتهم، كل زعيم هيحتاج منك تركيز على نقاط معينة في الجيم بلاي عشان تعرف تهزموا وده هيخلي التجربة ممتعة  ومميزة اكتر.

اللعبة هي ميكس واضح بين Dark Souls و Sekiro، سهولة الحركة والتنقل بتاعت سيكرو مع الكومبات الصعب والتقيل الخاص بدارك سولز، اللعبة هيكون فيها تخفي وتسلل وهتقدر تتحكم في كل موقف وكل مواجهة بأسلوبك وطريقتك المفضلة. كمان شخصيات العالم هيكون ليها دور فاهتقدر تستفيد منها بمساعدتك في اللعبة وكمان في منهم الي هيهجموا عليك، كل شخصية ليها دور وكل شخصية ليها مهمة وانت الي هتحدد اهمية كل شخصية بالنسبالك عن طريق إختياراتك.

اللعبة هترجعنا تاني لأسلوب دارك سولز وهتقدر تلعبها مع 3 من اصدقائك مما يعني اننا هنشوف Online multiplayer وجو invasion تاني، التجربة هتكون أصعب وامتع خاصةً لو جربتها مع اصحابك وخلصتوا القصة مع بعض او عملتوا invasion على لاعبين آخرين.

وطبعاً اخر حاجة هنتكلم عليها هي ميعاد الإصدار، لعبة Elden Ring هتصدر على PC و PlayStation 4 و PlayStation 5 و Xbox One و Xbox Series X|S، لو اشتريت اللعبة على الجيل الي فات هتاخد ترقية مجانية بالكامل لنسخة الجيل الجديد عشان تستمتع باللعبة على مختلف المنصات الي معاك بدون ما تدفع أي فلوس زيادة.

هتتوفر Elden Ring في 21 يناير 2022 وطبعاً إستنوا مراجعتنا الكاملة بالإضافة إلى تغطية كبيرة بنشر صور وفيديوهات جيم بلاي كتير لإستعراض اللعبة.

Website: www.gamezawy.com
Facebook: www.gamezawy.info
Instagram: www.gamezawy.co
YouTube: www.gamezawy.club
Telegram: t.me/gamezawyco

Ahmed Yousry

About promidoz

Editor-in-Chief. About 5 years of experience in Gaming Journalism with more than 13k news written, tens of articles, video scripts and reviews. A hardcore gamer that loves a challenge.