Articles, Gaming News, News

قاطعوا لعبة Sniper Ghost Warrior Contracts 2 !

من 3 أسابيع تقريباً نزلت لعبة Sniper Ghost Warrior Contracts 2 من إستوديو CI Games، إحنا جربنا اللعبة بشكل كامل وكنا ناويين نعمل مراجعة ليها بس ده هنتغاضى عنه بسبب الي حصل خلال الفترة الي فاتت. خليني اشرحلكم بإختصار إيه الي حصل وليه انا بقولكم قاطعوا اللعبة.

موقع The Gamer بالإضافة لـ 4 مواقع كمان و5 من مقدمين المحتوى على YouTube تمت دعوتهم لتجربة عالم Sniper Ghost Warrior Contracts 2 في الحقيقة. إستوديو CI Games إتعاقد مع أحد مقرات تدريب الجيش الأمريكي عشان يعملوا عالم اللعبة فيه ويخلوا الناس يعيشوا التجربة. لحد هنا الدنيا تمام، طب ايه الحاجة الي بوظت التجربة على محرر موقع The Gamer ؟

اتفاجئ المحرر إن تصميم البيئات وشكلها قريب جداً من شكل بيئات الشرق الأوسط الي بتتقدم في الإعلام والأفلام والمسلسلات، مش بس كدة، ده كمان الأشخاص الي هيمثلوا دور الأعداء ملهومش أي علاقة باللعبة ومش لابسين زي أعداء اللعبة، مقر الجيش الأمريكي ملبسهم لبس قريب للبس العرب والشخص الي كان بيقود الجولة ( شخص من الجيش ) بيقولهم إن الناس ديه الي لابسة لبس شبه العرب دول قتلوا أمريكان كويسين كتير، قال يعني كدة بيحفزهم عشان يقتلوهم وينتقموا للأمريكان الي ماتوا !

بدأ محرر The Gamer التجربة وكانت تجربة عادية كأنك بتلعب اللعبة في الحقيقة وبتضرب نار على الاعداء وبتقنصهم بالقناصات. في النهاية طلبوا منهم إنهم يتجمعوا عشان ياخدوا صورة، الصورة هتكون عبارة عن إن الـ 10 ( المحررين واليوتيوبرز ) هيوقفوا في صف رافعين ايدهم كقبضة في وش الأعداء، والاعداء الي هما لابسين لبس عرب هيرفعوا ايدهم في الهوا كأنهم بيستسلموا وانهم اتهزموا بقى.

محرر The Gamer قرف من الموقف وقرر إنه يمثل إنه جاتله مكالمة ومتصورش معاهم لأنه مش عايز يكون موجود في موقف زي كدة، قرار محترم جداً من المحرر ERIC SWITZER وإحنا في جيمزاوي بنشكره على إتخاذه قرار زي ده وبنشكره إنه كتب مقال زي ده بيوضح مدى الرؤية المقرفة للغرب عن العرب وانهم بيعتبرونا إننا كلنا إرهابيين وخلاص !

الموضوع انتشر بشكل كبير وإستوديو Ci Games قرر إنه ينزل إعتذار، في الإعتذار الإستوديو بيذكر إنهم مقدروش يكونوا في مقر التدريب ده بسبب فيروس كورونا، المشكلة الأكبر إن الإستوديو كان طالب من مقر التدريب حاجات معينة تتعمل ولما مقر التدريب قالهم انهم هيغيروا حاجات ( زي لبس الناس الي بقى شكله عربي ) الإستوديو مرفضش ومقالش حاجة، لو هما كانوا مهتمين أوي بالعرب أساساً أو عندهم أي إحترام لينا كانوا هيوقفوا الـ Press Event ديه وهيطلبوا إلغائها بشكل كامل أو على الاقل هيدوروا على مقر جيش تاني ميكونش فيه عنصرية ضد العرب وينفذوا الي هيتطلب منهم وخلاص.

طبعاً إعتذار الإستوديو مش منطقي ومش مقبول وردود الناس على تغريدة الإعتذار بيوضح إن الكل مستاء بشكل كامل من الإستوديو وإن كان المفروض يتم إتخاذ قرارات تانية أفضل من كدة عشان يضمنوا ان التجربة ميكونش فيها أي نوع من العنصرية ضد العرب الي هما برضو بيشتروا ألعابكم وبيحبوا يجربوها.

خلاصة الكلام إن إحنا في جيمزاوي هنا قررنا نقاطع اللعبة بشكل كامل، مش هننزل مراجعة ليا ولا هنكمل تغطيتنا ولا أي حاجة لإن بما إنك كإستوديو محترمتش اللاعبين العرب وخليت مقر جيش عنصري يعمل كدة ضدهم، فإحنا كمان مش مهتمين بلعبتك ولا هنحترمها. إحنا بننصح الناس إنها تقاطع اللعبة مقاطعة تامة في مصر والشرق الأوسط كله عشان نوصل رسالة للإستوديو إننا مستائين من الي حصل، نتمنى إن وقفتنا كعرب ضد الكراهية الي بتحصل ضدنا يكون ليها صوت وسط مجتمع اللاعبين والموضوع ده ميتكررش تاني. نحب كمان نشكر موقع The Gamer لوقفته معانا كعرب ونشرهم لتلك المقالة.

Website: www.gamezawy.com
Facebook: www.gamezawy.info
Instagram: www.gamezawy.co
YouTube: www.gamezawy.club
Telegram: t.me/gamezawyco

Ahmed Yousry

About promidoz

Editor-in-Chief. About 5 years of experience in Gaming Journalism with more than 13k news written, tens of articles, video scripts and reviews. A hardcore gamer that loves a challenge.