دليلك, عن الألعاب

إستعراض Cyberpunk 2077

سايبر بانك تقريبًا أكتر لعبة أنا مستنيها في التاريخ ، بعد ما تم الإعلان عنها في 2012 مع ويتشر 3، وكان باين إنها لعبة بفكر مختلف عن أي حاجة شوفناها قبل كده.

لو مكنتش تعرف، اللعبة مشقتة من لعبة لوحية وهي نوع الألعاب اللي بتكون زي لعبة الشطرنج مثًلا ولكن بقصة وأحداث وعالم، وده نوع ألعاب مش منتشر أوي عندنا في العالم العربي لكن معروف جدًا ومحبوب في الغرب، وعشان كده اللعبة ليها lore كبير يبدأ بيه المطور وحط أفكاره الخاصة وبني عالم ضخم جدًا مليان تفاصيل يمكن أكتر من عالم ويتشر 3، أو سكايرم.

كلمة Cyberpunk بتشير برضو لنوع من أنواع الاتجاه الفني والزمني، زي مثلًا كلمة steampunk أو  Post apocalypse وهم كلمتين بيشيروا لنوع من أنواع الSetting

الCyberpunk هي الرأسمالية في ذروتها، بيئة فيها تكنولوجيا متطورة، بحكم كونها في المستقبل البعيد اللي الشركات سيطرت في علي العالم بدل الحكومات، واللي بتكون موجودة لكن بتبقي ضعيفة وملهاش سلطة فعلية علي شيء لأن الشركات هي المسيطر الفعلي علي الفلوس والعتاد والإيد العاملة اللي تمشي بيها الدنيا.

خلينا نقول مثلًا شركة زي جوجل، أو أبل استمروا في جمع الفلوس لحد ما بقي ليهم سلطة يعملوا اللي هما عايزينوا ويبقوا كيان مستقل الحكومات متقدرش تمنعه من فعل أي شيء.

هو ده عالم الCyberpunk بشكل مختصر، ولعبتنا بتحصل في العالم ده وفكرة اللعبة هي إن المطور صنعلك عالم تقدر تحقق فيه الأحلام الخاصة بيك من ناحية النوع ده من العوالم.

لو شوفت فيلم Blade-runner وبتحبه زي مانا بحبه غالبًا هيكون نفسك تحقق حلمك إنك تكون محقق في العالم ده وتعرف نوعيات الجرايم اللي بتحصل في الوقت ده في المستقبل الافتراضي، وتخش بعض المطاردات والمواجهات مع المتهمين بقي، وده اللي قال مطور اللعبة إنه ممكن من خلال لعبتهم.

مع وجود خطوط عريضة للقصة وشخصيات جانبية بتختلف تمامًا علاقتك بيهم علي حسب سلوكك في اللعبة، وده معناه إنك ممكن حرفيًا تعمل أي شيء،لكن مع الحفاظ علي عدم جعل الحرية زيادة عن المطلوب، فتخليك تحس إنك بتلعب في walking simulator بدون أي قصة أو أحداث بتوظف العالم ده والجيم ميكانكس. طيب إيه هي الخطوط العريضة للقصة والعالم اللي المطور حطهالك؟!

1-قصة اللعبة

بتدور حوالين شخصية V اللي أنت بتلعب بيه، وممكن تخليه حرفيًا أي حاجة إنت عايزها شكلًا وموضوعًا، من أول ال character customization اللي ببيخليك تغير في شكل شخصيتك زي مانت عايز وبشكل غير مسبوق لدرجة إنك ممكن تختار تلون سنانه، وبعدها اللعبة بتقدملك 3 خيارات للbackstory الخاصة بشخصيتك وهم:

Nomad:

واحد من سكان مكان إسمه الBadlands شبيه شوية بعالم مادماكس، لأنه موجود في الصحرا، وسكان المكان ده واضح إن ليهم نشاطات إجرامية ما، وبيعانوا من الفقر، وانت بتحاول تتقرب لناس جوة المدينة، تقريبًا القصة شبيهة شوية بقصة Niko Bellic بطل لعبة GTA iv أو فيتو بطل مافيا 2 من حيث فكرة دخول عالم جديد عليك وبناء علاقات من الصفر والصعود للقمة بقي وكده.

Corpo :

بتبدأ اللعبة كواحد بيشتغل في أحد الشركات العملاقة، يعني في وسط المعركة الحامية علي السيطرة اللي دايرة بينهم، وبتعمل مهمات لصالح موظف أعلي منك عايز يوقع مديره، ده كل اللي عرفناه لحد دلوقتي بس واضح إن الخط ده من الأحداث هيتيحلك إنك تبقي قريب أكتر لدايرة صناع القرار في عالم اللعبة، مش مجرد مواطن يعني أو مجرم في العالم ده.

Street Kid:

بتكون عضو من أعضاء عصابة من العصابات المهتمة بجمع قطع الغيار والأجزاء الإلكترونية وبيعها في السوق السودا، وده بيخليك قريب أكتر للعالم الخفي والإجرامي بتاع اللعبة، وبتشتغل لحساب اللي يدفع أكتر.

بعد اختيار الorigin story بتاعتك ، بتختار الbuild بتاعتك، واللي بيكون قدامك فيها اختياراين هم net runner و strong solo الأول بيبقي معتمد أكتر علي التسلل والهاكينج، والتاني معتمد علي القدرة علي الدخول في مواجهات واحد ضد واحد مع معظم أنواع الأعداء في اللعبة.لكن العظيم في اللعبة إنها بعد ما بتختار بتتيحلك إنك تنوع في اختاراتك قدام في اللعبة وتختار مهارة من أي شجرة مهارات إنت عايزها.

العصابات:

VODO BOYS : ناس بتوع سحر ومخدرات، و موجودين في PACIFICA  بيتميزوا في براعتهم في الهاكينج والعنف الشديد بدون سبب، زيعمتهم هي Maman Brigitte

Maelstrom:عصابة صغيرة مسيطرة علي المنطقة المحيطة بالمينا

animals : عصابة عنيفة ليها في كل النشاطات الإجرامية، بيتميزوا البنية الجسدية القوية وزعيمتهم ست برضو اسمها Sasquatch هتكون واحدة من الزعماء اللي هنحاربهم في اللعبة

Nomads:مجموعة من المهمشين اللي فقدوا بيوتهم وأملاكهم بسبب الشركات العملاقة، بيتميزوا بكرههم الشديد  للشركات دي وترابطهم، وأسلحتهم المميتة والرخيصة
Tyger’s claw:عصابة يابانية غير مهتمة بالتكنولوجيا، بيحبوا الأسلحة اليابانية التقليدية
Valentino’s: مش متقال عنهم معلومات
Boostergangs :عصابة مهتمة فقط بالأجزاء الإلكترونية لجسم الإنسان ومستعدي لفعل أي شيء لإيجاد قطع واختراعات جديدة وفي اللعبة هتبدأ مغامرتك بالتوازي مع بحثهم عن شيء أسمه الChip of immortality او شريحة الخلود

edge runners: مجموعة من المرتزقة اللي بيعملوا عمليات لأي طرف مش عايز يخش حرب مفتوحة مع طرف تاني، ودول غالبًا اللي بتدور حواليهم أحداث المسلسل اللي أعلنوا عنه هنتكلم عنه تحت.

2-الجيم بلاي ميكانكس:

بما إن رؤية اللعبة إنها لازم تديك فرصة تعمل كل اللي إنت عايزه، فالسواقة والاشتباكات بكل أنواعهم موجودين، حتي سواقة الدراجات النارية، واللي كان شكلها غريب شوية في المنظور الأول.

فكرة النظور الأول أزعجت ناس كتير في الأول، وطالبوا علي الأقل إن يكون فيها منظور تالت بجانب المنظور الأول زي لعبة Red dead redemption 2 ولكن مخرج اللعبة كانت حجته إن اللعبة مصممة مخصوص عشان تتلعب بالمنظور الأول، بداية من الحوارات، اللي بتكون الشخصيات اللي بتكلمك مقربة للكاميرا جدًا وبيكون جزء من الادماج في اللعبة مرهون بالحوارات دي زي لعبة Bioshock و Far cry 3 واللي كانت المقاطع السينيمائية فيهم قليلة، لكن الحوارات والمونولوجات فيهم كانت قوية وكتير. لكن اللاعبين كانوا بيتمنوا يعيشوا التجربة زي GTA ، ودي نقطة هنجيلها بعد شوية.

القتال بالأسلحة النارية في العروض كان محل شك أو خوف من اللاعبين لكن الصحفيين اللي جربوا ال5 ساعات ديمو اللي اتعمل من تلات أسابيع قالوا إن الشوتينج جيد جدًا، مش زي Red dead مثلا لكنه مقبول جدًا، وأفضل من المعارك في ويتشر والاستجابة فيه سريعة الأسلحة النارية متنوعة بشكل ممتاز، لكن طبعًا 5 ساعات مش كافيين إنهم يكونوا حكم نهائي.

السواقة برضوا قالوا إنها مقبولة جدًا، لكن اللي ممكن يكون مشكوك في أمره هو الMelee attacks كانت غريبة ومش فعالة أوي في أغلبية الأحوال، والغريبة إن اللعبة بتقدم Mini games علي هيئة ماتشات ملاكمة.

مخرج اللعبة Adam Badowski حذر من إنك تخش اللعبة وأنت في دماغك إن دي Gta في المستقبل، وبيقول إن ده غلط ومابيتفقش مع رؤية اللعبة، واللي بتحاول تقدمه، لإن هنا كل خطوة محسوبة وليها عواقب، وغلطة بسيطة ممكن تدخلك في عداوة دايمة مع واحدة من العصابات أو الfactions اللي موجودة في اللعبة.

3- المهمات الجانبية وحجم الخريطة:

المطورين قالوا إنهم عملوا عدد ضخم من المهمات الجانبية، وكلها ليها قصتها الخاصة، وشبهوا المهمات الجانبية بإضافة Blood and wine بتاعة ويتشر 3 ودي للي ميعرفش واحدة من أفضل الإضافات في عالم الألعاب، وممكن حقيقي تنافس علي لقب أحسن لعبة كمان عادي!

تصميم المهمات ده معناه إن كل مهمة هتكوت ليها قصتها وممكن يكون فيها set pieces أو ممكن مجموعة مهمات فرعية تقدم قصة واحدة، وقالوا كمان إن الاهتمام بالقصص الفرعية بالنسبالهم زي بالضبط المهمات الأساسية عشان دي بتساعدك أكتر إنك تصدق العالم وتكون حابب أكتر تحط وقتك فيه!

الخريطة للأسف أصغر من ويتشر 3 بشوية، وحجة المطورين لما اتكلموا في الموضوع ده إن الجودة أهم من الكم، وإن العالم ده كان مرهق في تصميمه، وكانوا عايزين يعملوا حاجة تبقي إنجاز غير مسبوق ليهم من حيث الجودة. والحقيقة أنا واثق فيهم..

4- مميزات كتير تقنية

اللعبة زي ما شوفناها في العروض عظيمة شكليًا، وهي تقريبًا اللعبة الوحيدة اللي قدمت عالم الcyberpunk بالشكل الممتاز ده، من أنوار نيون وإعلانات ضخمة، ومباني شاهقة وكمان أشكال العربيات والمباني الفريدة من نوعها، ولك أن تصدق إن كل الكلام ده مش هيكون فيه ولا Loading screen!!! إنت متخيل؟

مفيش شاشات تحميل خالص غير وقت ما تفتح اللعبة ولو عملت fast travel، يعني كل شيء إنت شايفه وإنت علي أعلي مبني في اللعبة هيكون موجود في مكانه بالفعل! ده إنجاز تقني عظيم لو قدروا فعلًا يحققوه بدون عيوب تقنية أو bugs.

كمان الستوديو المطور CD Project red أعلنوا إن اللعبة بتدعم الsmart delivery وهو إنك لو اشتريتها علي الجيل الحالي هتحصل علي نسخة الجيل الجديد مجانًا! شيء عظيم خصوصًا في ظل الإشاعات اللي بتقول إن ألعاب الجيل الجديد احتمال تبقي ب 70 دولار.

مسلسل اللعبة علي نتفليكس

أعلن المطور في شهر يونيو اللي فات عن مسلسل شغالين عليه مع نتفليكس وهيتعرض في 2022 ( عملوا قبل كده ذا ويتشر وطلع بمستوي جيد جدًأ)

والحاجات دي الحقيقة مفيدة جدًا لعالم اللعبة، بتضيفله احساس واقعية أكتر كل ما بتعرف عن قصص الشخصيات اللي موجودين فيه، والأحداث اللي حصلت سواء كانت قبل أو بعد أحداث اللعبة، وممكن نبقي نتلكم في مقالة تانية بعد ما اللعبة تنزل إحنا عايزين نشوف إيه في المسلسل ده.

في الآخر:

في زمن مش بعيد، bethesda كانت بتعرف تعمل عوالم عظيمة ومليانة تفاصيل وبجودة كويسة، زي سكايرم و فول أول، لكن حاليًا البساط شكله بيتسحب من تحتهم ورايح لcd project red اللي حقيقي أبهرونا بواحدة من أعظم الألعاب من حيث الجودة Witcher 3 ومشروعهم الجديد في عالم جديد عليهم تمامًا، ولو نجحوا فيه زي ما نجحوا في ويتشر، هيتنقلوا نقلة كبيرة جدًا، وممكن كمان يتشالوا علي الأعناق…

أنا حقيقي مش قادر أخفي تحمسي للعبة دي نهائي، وسعادتي وأنا بحكيلك عنها دلوقتي، لكن الجانب السيء شوية من الموضوع إن اللعبة دي كان فيها مشاكل وخدت تأجيلات كتير من ساعة الإعلان عنها، فأتمني إنها توصلنا بالشكل اللي نتمناه..وأكيد هنعمل مراجعة وهنتكلم عنها هنا في جيمزاوي.

Mostafa Argoun

About Mostafa Argoun

محرر في مجال الألعاب منذ عام 2012 بعتبر الألعاب فن، وبحب ألعاب القصة والأر بي جي بشكل رئيسي