مع بداية أي سنة جديدة لازم نبدأ نشوف تسريبات وإشاعات عن لعبة Call of Duty الي جاية والمرة ديه التسريبات بتقول إن لعبة Call of Duty 2021 هتكون في الحرب العالمية الثانية.
التسريب جاي من مُسرب معروف على تويتر بإسم @Victor___Z وهو مُسرب معروف بنقله لأخبار صحيحة 100% عن Call of Duty Black Ops Cold War قبل إصدارها. المُسرب أكد إن اللعبة هتكون في الحرب العالمية الثانية من غير ما يشارك بأي تفاصيل تانية عن اللعبة أو فكرتها أو هتقدم إيه.
إحنا عارفين إن اللعبة هتكون من تطوير إستوديو Sledgehammer Games الي قدملنا تجارب مميزة في السلسلة زي Advanced Warfare و World War II. اخر لعبة قدمها الإستوديو كانت في الحرب العالمية الثانية فالموضوع هيكون مثير للإهتمام إننا نشوفهم بيقدموا نفس الفكرة تاني بس أكيد المرة ديه الموضوع هيكون مختلف وهنشوف حاجة متغيرة تماماً عن لعبة World War II الي نزلت في 2017.
الإعلان عن لعبة Call of Duty 2021 هيكون خلال أبريل أو مايو ووقتها هنتأكد من تفاصيل أكتر عن اللعبة وهنعرف فعلاً إذا كانت في الحرب العالمية التانية ولا لا. متنسوش تتابعونا على مواقع التواصل الإجتماعي عشان تعرفوا أخر الأخبار والتسريبات :